जनकपुरधाम– प्रदेश २ का मुख्यमन्त्री लालबाबु राउतले कोरोना महामारी नियन्त्रणको लागि सहयोग गरिदिन प्रदेशस्थित राष्ट्र संघीय निकाय (यूएन एजेन्सी) हरुलाई अपील गरेका छन् ।

सोमबार प्रदेश नीति तथा योजना आयोगको संयोजनमा मुख्यमन्त्री निवास मधेश भवनमा सम्पन्न युएन एजेन्सीहरु संगको छलफलमा मुख्यमन्त्री राउतले महामारी नियन्त्रणका लागि अतिआवश्यक देखिएको भेन्टिलेटर, अक्सिजन ग्यासको आपूर्ति, औषधि, जनशक्ति र भ्याक्सिन उपलब्ध गराई दिन अपील गरेका हुन् ।

युएन एजेन्सीहरुले मुलुकलाई गर्दै आएको सहयोग प्रदेशमा खासै नपुगेको गुनासो गर्दै मुख्यमन्त्री राउतले युएन एजेन्सीहरुबाट आउने सहयोग प्रदेश २ सम्म ल्याउनका लागि पहल गर्न समेत प्रदेशस्थित प्रतिनिधिहरुलाई आग्रह गरे ।

समुदाय स्तरमा कोरोना फैलिएपछि प्रदेश २ मा अक्सिजन अभाव भएको छ । भेन्टिलेटर अभावमा पनि बिरामीहरूले ज्यान गुमाइरहेका छन् ।