दोहा : नेपाली श्रमिकको प्रमुख श्रम गन्तब्य रहेको कतारमा कोरोना भाइरसविरुद्धको तेस्रो डोज खोप लगाउन शुरु गरिएको छ ।

आठ महिना भन्दा पहिले भ्याक्सिनको दोस्रो डोज पाएका सबै व्यक्तिहरुको लागि तेस्रो डोज खोप लगाउन थालेको कतारको स्वाथ्य मन्त्रालयले जनाएको छ ।

कोभिड–१९ विरुद्धको तेस्रो डोज खोप लगाउने कतार युनिभर्सिटीका पूर्व निर्देशक डाक्टर अब्दुल्लाह अल कुबैसी रहेको र उनले मदिना खलिफा स्वास्थ्य केन्द्रमा पुगेर बुधबार खोप लगाएको मन्त्रालयले जनाएको छ ।

बुस्टर खोप डोज नाम दिइएको तेस्रो डोज खोप फाइजर, बायोएनटेक र मोर्डनाबाट निर्माण भएको हो । उक्त तेस्रो डोज खोप गम्भीर संक्रमणको जोखिम रहेका व्यक्तिहरुमा केन्द्रित हुने जनाइएको छ । अहिलेसम्म कतारमा ४६ लाख २४ हजार १७९  जनालाई खोप वितरण गरिसकिएको मन्त्रालयले जनाएको छ ।

अहिलेसम्म कोरोनाबाट कतारमा २४ नेपाली श्रमिकले ज्यान गुमाएको दोहास्थित नेपाली दूतावासले जनाएको छ । कतारले आफ्ना नागरिकसहित अन्य आप्रवासी श्रमिकहरुलाई पनि निशुल्क रुपमा खोप लगाउँदै आएको छ ।