हङकङ(दैनिक जागरण)– सेल्फीको लत कति खतरनाक हुन्छ भन्ने कुराको अन्दाज लगाउन सकिँदैन । हङकङकी एक प्रख्यात मोडल सोफिया चेउङ यस्तै सेल्फी लतको शिकार बनेकी छन् ।

यी ३२ वर्षीया सामाजिक सञ्जाल अभियन्ताले आफ्नो फ्यानलाई प्रभावित गर्नका लागि अग्लो स्थानमा गएर सेल्फी लिँदा लडेर ज्यान गुमाएकी छन् ।

सोफिया गत साताको शनिबार आफ्नो साथीहरुसँग हङकङको हा पाक लई नेचर पार्क घुम्न गएकी थिइन । यही समयमा उनीमाथि यो घटना भएको हो । उनी पाइनएप्पल माउण्टेनमा चढेर सेल्फी लिन खोज्दा लडेकी थिइन् । लडेर गम्भीर घाइते भएकी सोफियालाई नजिकको अस्पताल पुर्याइए पनि चिकित्सकले उनलाई मृत घोषणा गरेका थिए ।

सोफियाको सामाजिक सञ्जालमा फ्यान फलोइङ उत्साहप्रद छ । उनको पोस्टमा लाइक र कमेन्ट अत्याधिक आउछन् । इन्स्टाग्राममा उनको २४ हजार बढी फलोअर्स छन् ।

सामाजिक सञ्जालमा सोफियाको पहिचान एक साहसी महिलाको रुपमा थियो । साहसी यात्रा गर्न रुचाउने उनी यात्राका तस्वीरलाई इन्स्टाग्राममा शेयर गर्थिन् ।