काठमाडौँ– रोजगारीका लागि विदेशिने नेपालीहरुको संख्या घटे पनि वैदेशिक रोजगारीमा कार्यरत नेपालीहरुले नेपाल पठाउने पैसा (रेमिट्यान्स) भने बढेको छ ।

वैदेशिक रोजगारीमा जानेको संख्गा ५९ दशमलव ९ प्रतिशतले घट्दा रेमिट्यान्स आप्रबाह भने १२ दशमलव ६ प्रतिशतले बढेको तथ्यांक नेपाल राष्ट्र बैंकले बुधबार सार्वजानिक गरेको छ ।

गत आर्थिक वर्षको ११ महिनामा ८ खर्ब ७० अर्ब रुपैयाँ रेमिट्यान्स भित्रिएको छ ।

नेपाल राष्ट्र बैंकले बिहीवार सार्वजनिक गरेको ‘देशको आर्थिक वित्तीय अवस्था’ मा सो रकम रेमिट्यान्समार्फत नेपाल भित्रिएको उल्लेख छ ।

समीक्षा अवधिमा रेमिट्यान्टस आप्रवाह १२.६ प्रतिशतले वृद्धि भई रु.८ खर्ब ७० अर्ब ९४ करोड पुगेको छ ।

अघिल्लो वर्षको सोही अवधिमा विप्रेषण आप्रवाह ३.२ प्रतिशतले घटेको थियो । अमेरिकी डलरमा विप्रेषण आप्रवाह १०.४ प्रतिशतले वृद्धि भई ७ अर्ब ३९ करोड पुगेको छ । अघिल्लो वर्ष यस्तो आप्रवाह ५.२ प्रतिशतले घटेको थियो ।

समीक्षा अवधिमा वैदेशिक रोजगारीका लागि अन्तिम श्रम स्वीकृति (संस्थागत तथा व्यक्तिगत–नयाँ र वैधानिकीकरण) लिने नेपालीको संख्या ५९.९ प्रतिशतले घटेको छ ।

अघिल्लो वर्षको सोही अवधिमा यस्तो संख्या १२.४ प्रतिशतले घटेको थियो । वैदेशिक रोजगारीका लागि पुनः श्रम स्वीकृति लिने नेपालीको संख्या समीक्षा अवधिमा ४७.१ प्रतिशतले घटेको छ ।

अघिल्लो वर्षको सोही अवधिमा यस्तो संख्या ३१.१ प्रतिशतले घटेको थियो ।

समीक्षा अवधिमा खुद ट्रान्सफर ११.४ प्रतिशतले वृद्धि भई रु.९ खर्ब ७१ अर्ब ४ करोड पुगेको छ ।

अघिल्लो वर्षको सोही अवधिमा यस्तो ट्रान्सफर ३.९ प्रतिशतले घटेको थियो ।