काठमाडौँ– अविरल वर्षाका कारण सिन्धुपाल्चोकको मेलम्चीस्थित इन्द्रावती नदीमा आएको बाढीमा परी एक जनाको ज्यान गएको छ भने २० जनाभन्दा बढी बेपत्ता भएका छन् । बाढीमा परी ५ जना घाइते भएका छन् ।

जिल्ला प्रहरी कार्यालय सिन्धुपाल्चोकका प्रहरी निर‍ीक्षक सञ्जिव योन्जनका अनुसार बुधबार दिनभरमा ७४ जनालाई उद्धार गरी सुरक्षित ठाउँमा सारिएको छ ।

घाइते भएका ५ जना मध्ये ४ जनाको अस्पालमा उपचार भइरहेको उनले बताए । एक जनाको धुलिखेल अस्पताल र ३ जनाको ललितपुरस्थित बी एण्ड बी अस्पतालमा उपचार भइरहेको छ ।

बाढी पहिरोमा परी २० जना सम्पर्कबिहीन भएको जानकारी प्राप्त भएको निरीक्षक योन्जनले खबरहबलाई बताए ।

उनका अनुसार बाढी पहिरोका कारण हालसम्म चार पक्की पुल र पाँचवटा झोलुङ्गे पुलमा क्षति पुगेको छ । यस्तै नदी आसपासमा रहेका सात वटा माछा फार्म बगेका छन् ।

बाढी पहिरोले कति घरमा क्षति पुग्यो भन्ने यकिन तथ्यांक भने आइ नसकेको निरीक्षक योन्जनले बताए ।

जिल्ला प्रहरी कार्यालय, सिन्धुपाल्चोकका प्रवक्ता प्रहरी नायब उपरीक्षक प्रकाश सापकोटाले भने १६ जना बेपत्ता भएको पुष्टि गरे । सम्पर्कमा नआएका अन्यबारे जानकारी लिने काम भइरहेको उनले बताए ।

जिल्लामा राहत व्यवस्थापन र उद्धारका लागि नेपाली सेनाको तीन वटा हेलिकोप्टर परिचालन गरिएको छ । गृह मन्त्रालयबाट खाद्यान्न, त्रिपाल, टेन्ट र स्लिपिङ ब्यागलगायतका सामग्रीको व्यवस्थापन भएको छ ।

यस्तै, मेलम्चीमा आएको बाढीले मेलम्ची खानेपानी आयोजनाको संरचनामा क्षति पुगेको छ । के कति क्षति पुगेको भन्नेबारे विवरण आइनसकेको आयोजनाले जनाएको छ ।

हेर्नुहोस् हेलिकोप्टरबाट खिचिएको भिडियो