काठमाडौँ- विश्व स्वास्थ्य संगठन (डब्ल्युएचओ)ले कोरोना भाइरसविरुद्धको अक्सफोर्ड–एस्ट्राजेनेकाले तयार पारेको खोप नरोक्न आग्रह गरेको छ ।

युरोपका विभिन्न देशले अक्सफोर्ड–एस्ट्राजेनेकाको खोप लगाउन रोकेपछि डब्ल्युएचओले अभियानलाई निरन्तरता दिन आग्रह गरेको हो ।

खोप र ब्लड कल्टबिच कुनै सम्बन्धको प्रमाण नरहेको र उक्त खोप सुरक्षित रहेको डब्ल्युएचओले प्रष्ट्याएको छ ।

अक्सफोर्ड–एस्ट्राजेनेकोको खोप लिएका व्यक्तिमा ब्लड कल्ट बनेको खबर सार्वजनिक भएपछि युरोपका विभिन्न देशले खोप अभियान रोकेका थिए । गएको हप्तासम्म उक्त खोप लगाएका ४० जनामा ब्लड कल्टको विकास भएको खबर सार्वजनिक भएको थियो ।

सम्भावित ‘साइड इफेक्ट’ लाई मध्यनजर गरि नेदरल्याण्डस, जर्मनी, फ्रान्स, इटाली र स्पेनले कोरोना भाइरसविरुद्धको अक्सफोर्ड–एस्ट्राजेनेकाको खोप मार्च २९ सम्म बन्द गरेका छन् ।

बेलायतसहित युरोपका विभिन्न देशमा अहिलेसम्म एक करोड ७० लाखभन्दा बढी मानिसले अक्सफोर्ड–एस्ट्राजेनेका खोपको पहिलो डोज लिएको अन्तर्राष्ट्रिय सञ्चार माध्यमहरूले जनाएका छन् ।