काठमाडौँ – नेपालको सबैभन्दा ठूलो ईन्टरनेट सेवा प्रदायक वल्र्डलिंकले ६ सय एमबीपीएस गतिको ईन्टरनेट भित्र्याएको छ ।

बुधबार काठमाडौंमा एक कार्यक्रमको आयोजना गर्दै कम्पनीले नेपाली बजारमा यो गतिको ईन्टरनेट सेवा ल्याइएको जानकारी दिएको हो ।

योसँगै अब वल्र्डलिंकको ईन्टरनेटको स्पिड कम्तिमा १५० एमबीपीएस गतिको हुने कम्पनीले बताएको छ । उपभोक्ताले पहिलाको भन्दा पनि सस्तो मूल्यमा कम्तिमा पनि १५० एमबीपीएस गतिको ईन्टरनेटको पाउने जनाइएको छ ।

घरायसी उपभोक्ताले अब वार्षिक १४ हजार ४ सय रुपैयाँ अर्थात् मासिक एक हजार दुई सय रुपैयाँमै १५० एमबीपीएस गतिको ईन्टरनेट उपभोग गर्न पाउने छन् । १५० एमबीपीएससहित २२५ एमबीपीएस र ३ सय एमबीपीएस गतिको ईन्टरनेट पनि पहिलाको भन्दा कम मूल्यमा उपभोग गर्न पाइने कम्पनीले जनाएको छ।

यस्तै वल्र्डलिंकले आठ हजार भन्दा अग्ला विश्वका १४ वटै हिमाल ७ महिनामा आरोहरण गरी विश्व कीर्तिमान कायम गरेका निर्मल पुर्जालाई सद्भावना दूत नियुक्त गरेको छ ।