काठमाडौँ- नेपाली कांग्रेसका केन्द्रीय सदस्य गगन थापाले अब महाधिवेशन हुने पक्कापक्की भएको बताएका छन् ।

आइतबारको केन्द्रीय समिति बैठकपछि महाधिवेशन हुन्छ भन्ने ढुक्क अवस्था आएको उनले बताएका छन् ।

काठमाडौं महानगर पार्टी समितिलाई सम्मान तथा बधाई ज्ञापन गर्न सोमबार काठमाडौँमा आयोजित कार्यक्रममा थापाले भने, ‘हिजोको बैठकपछि भने अधिवेशन हुन्छ भन्ने ढुक्क भएका छौँ, पार्टीले होटल र हल बुक गर्न थाल्यो।’

निर्वाचन आयोगले बारम्बार दिएको दबाबपछि मात्रै अहिले नै महाधिवेशन गर्ने अवस्थामा पार्टी पुगेको उनको भनाइ छ ।

‘महाधिवेशन हुन्छ भन्ने अवस्था थिएन । निर्वाचन आयोगले तारन्तार दबाब नदिएको भए वा पुस पहिलो साताभित्र नयाँ नेतृत्वको नाम आयोगमा बुझाउनुनपर्ने भए अहिले नै हामी महाधिवेशन गर्दैनथ्यौँ होला’, उनले भने, ‘यो सामूहीक क्षयीकरणको प्रमाण हो । हामीले विधानको सर्वोच्चतालाई स्थापित गर्न सकेनौँ।’

उनले १३ लाख मत थप गरे मात्रै कांग्रेस अब पहिलो पार्टी बन्ने बताए । नयाँ मतदातालाई पार्टीमा आकर्षित गर्ने गरी काम गर्नुपर्ने उनले बताए ।