काठमाडौं– गत शुक्रबार महानगरीय प्रहरी कार्यालय रानीपोखरीले सार्वजनिक गरेको साढे २ किलो धातु युरेनियम– २३८ अर्थात युरेनियमको कच्चा पदार्थ नै भएको देखिएको छ ।
नेपाल विज्ञान तथा प्रविधि प्रज्ञा प्रतिष्ठान (नास्ट)का अनुसार उक्त धातु युरेनियम– २३८ भएको पुष्टि भएको हो ।
नास्टका प्रवक्ता डा. सुरेशकुमार ढुङ्गेलले खबरहबसँग भने, ‘परीक्षणका लागि भन्दै प्रहरीले हामीलाई धुलो पठाएको थियो । त्यो धुलोबाट उत्सर्जित विकिरणलाई अध्ययन गर्दा युरेनियम – २३८ (कच्च पदार्थ) भएको खुल्यो ।’
डा. ढुंगेलका अनुसार युरेनियम– २३८ लाई नै प्रशोधन गरेर पूर्णरूपमा युरेनियम– २३५ बनाइन्छ ।
तर नास्टले अहिले यसलाई विकिरण पद्धतिबाट मात्रै परीक्षण गरेकाले त्यो धुलोमा युरेनियमको मात्रा कति छ भन्ने बारेमा भने खुलेको छैन ।
डा. ढुंगेलले भने, ‘अहिले विकिरण पद्धतिबाट मात्र परिक्षण भएको छ त्यसबाट युरेनियम देखिए पनि कति मात्रामा छ भन्नलाई केमिकल माध्यमबाट पनि परीक्षण गर्नुपर्छ । त्यसपछि मात्र खुल्छ ।’
प्रवक्ता ढुंगेलका अनुसार प्रहरीलाई उनीहरुले पठाएको स्याम्पलमा परीक्षण गरी युरेनियम–२३८ रहेको भनी नास्टले पत्र समेत पठाइसकेको छ । यता प्रहरीले भने उक्त धातुको बारेमा थप परीक्षण भइरहेको बताएको छ ।
प्रहरीले गत शुक्रबार उक्त धातुसहित ४ जनालाई पक्राउ गरी सार्वजनिक गरेको थियो । प्रहरीका अनुसार पक्राउ पर्नेमा रामेछापको लिखु तामाकोशीका ४० वर्षीय नारायण सिंह तामाङ, ४० वर्षकै जानुका तामाङ, रामेछापकै बागजोरका २० वर्षीय प्रकाश चौहान र सिन्धुलीका २० वर्षीय मनोज न्यौपाने रहेका छन् ।
यो पनि पढौँ
प्रतिक्रिया