काठमाडौँ– सेनाले नुवाकोट र लमजुङमा निःशुल्क स्वास्थ्य शिविर सञ्चालन गरेको छ ।

जनसम्पर्क तथा सूचना निर्देशनालयले नुवाकोटमा २ दिने र लमजुङमा एक दिने निःशुल्क स्वास्थ्य शिविर सञ्‍चालन गरेको हो ।

नुवाकोटमा जबरजंग गण र जिल्ला अस्पताल त्रिशुलीको सहकार्यमा किस्पाङ्ग गाउँपालिका-३ स्थित काउले स्वास्थ्य चौकी परिसरमा मिति माघ २७ र २८ गते स्थानीय बासीलाई लक्षित गरि दुईदिने नि:शुल्क स्वास्थ्य शिविर संचालन गरेको हो ।

शिविरमा जिल्ला अस्पताल त्रिशुलीका हाडजोर्नी, प्रसुती तथा स्त्री रोगलगायतका ४ विशेषज्ञ डक्टर एवं नेपाली सेनाका २ जना डक्टरको टिमले संयुक्त रूपमा स्थानियबासीहरूको स्वास्थ्य परीक्षण गरेको थियो ।

स्वास्थ्य शिविरबाट पुरुष-१४४, महिला-३२९ र बालबालिका-२६ गरि ४९९ जना सर्वसाधारण लाभान्वित भएका निर्देशनालयले जनाएको छ ।

यसैगरी लमजुङमा फागुन १ गते श्रीजंग गण र जिल्ला अस्पताल वेशीशहरको सहकार्यमा दोर्दी गाउँपालिका-८, बन्सारस्थित फलेनी मा.वि. को प्राङ्गणमा शिविर सञ्चालन गरेको थियो ।

जिल्ला अस्पताल बेशिसहरका २ र नेपाली सेनाका २ जना डक्टरसहितको १४ जनाको मेडिकल टिमले १ दिने नि:शुल्क स्वास्थ्य शिविर संचालन गरेको हो ।