काठमाडौं–सांगीतिक कार्यक्रमका लागि अमेरिका जाने नेपाली गायकगायिकाका लागि बाल्टिमोर अनिवार्य उपस्थिति झैं भइसक्यो । अमेरिका पुग्ने जोकोही सांगीतिक स्रष्टा बाल्टिमोरमा कार्यक्रम गर्न छुटाउदैनन् ।

कोरोनाका कारण सुनसान बनेको यो सहर गत आइतबार संगीतमय बन्यो । लामो समयदेखि अमेरिकामा बस्दै आएकी लोक गायिका सिर्जना बिरही थापाको संयोजनमा भएको सांगीतिक कार्यक्रममा नेपालबाट पुगेका गायक हेमन्त शर्मा र पुरुषोत्तम न्यौपानेले आफ्ना लोकप्रिय गीत सुनाए ।

कार्यक्रममा गायक भगवान भण्डारी, राजन ठकुरी, लोकगायिका सिर्जना बिरही थापाले पनि सांगीतिक माहोल तताएका थिए । ‘सगरमाथा सांगीतिक साँझ’ नाम दिइएको कार्यक्रममा नेपालीको बाक्लो उपस्थिति थियो ।

लोकगायक प्रेमराजा महतको प्रमुख आतिथ्यतामा भएको कार्यक्रममा उनले दुई टुक्रा गीत गाएका थिए ।