काठमाडौँ– अमेरिकी सिनेटर एड मर्कीले अमेरिकाले बचतमा रहेको खोप नेपाललाई तत्काल उपलब्ध गराउनु पर्ने र सहायतालाई वृद्धि गर्नु पर्नेमा जोड दिएका छन् ।

अमेरिकी संसदको नवीकरणीय ऊर्जा, जलवायु तथा आणविक सुरक्षा समितिका अध्यक्ष समेत रहेका मर्कीले नेपालसहित विश्वलाई उपलब्ध हुने गरी अमेरिकाले खोप उत्पादन गर्नुपर्ने बताएका हुन् ।

ट्वीटमार्फत उनले अमेरिकाले बचतमा रहेको खोप नेपाललाई तत्काल उपलब्ध गराउनुपर्ने उल्लेख गरेका छन् । साथै उनले नेपाललाई गर्ने सहायतालाई अमेरिकाले अभिवृद्धि गर्नुपर्ने पनि जनाएका छन् ।

कोभिड-१९ को कारण नेपालमा मृत्यु भएकाको अवस्था हेरेर आफू स्तब्ध भएको उल्लेख गर्दै मर्कीले महामारीविरुद्ध नेपाललाई सहयोग गर्नुपर्ने खाँचो औंल्याएका हुन् ।

म्यासाचुसेट् राज्यका सांसद समेत रहेका मर्कीले पूर्वी एसिया र प्यासिफिकको अमेरिकी मामिला पनि हेर्छन् ।

नेपालको कोभिड संक्रमण अवस्थालाई लिएर बिहीबार अमेरिकी संसदको वैदेशिक मामिला समितिमा छलफल भएको थियो । उक्त छलफलमा सांसदहरुले नेपाललाई तत्काल आफ्ना नियोगबाट सहयोग गर्नुपर्ने उल्लेख गरेका थिए ।