काठमाडौँ– प्रधानमन्त्री केपी शर्मा ओलीले सर्वोच्च अदालतले गरेको फैसलाको तीव्र आलोचना गर्दै रेफ्रीले नै गोल गर्न खोजेको आरोप लगाएका छन् ।

प्रधानमन्त्रीका रुपमा सिंहदरबार छाड्नु अघि अन्तिम सम्बोधन गर्दै ओलीले फैसलाले नेपालमा दलीय प्रणालीको आधारभूत प्रस्तावनालाई नै चुनौती दिने काम गरेको आरोप लगाए ।

उनले भने ‘रेफ्री स्वयम्‌ले गोल गर्ने र खास पक्षलाई जिताउने इच्छा भयो भने जोखिम हुन्छ ।’

ओलीले अदालतबाट आउने सम्भावित फैसला अघि नै खास व्यक्ति र समूहलाई प्राप्त हुने अवस्था पनि देखिएको उल्लेख गर्दै राष्ट्रका विभिन्न अंगबीचको सन्तुलन खल्बल्याउने काम भएको बताए ।

अदालतले जस्तो सुकै अप्रत्यासित फैसला गरेपनि त्यसलाई कार्यान्वयन गर्ने बताए । साथै उनले पार्टी कार्यकता र जनतालाई संयम हुन आग्रह गरे ।

प्रधानमन्त्री ओलीले संविधानको अपव्याख्याले पछि फर्किने गरी संविधानको संशोधन गर्ने काम भएपनि बताए ।

ओलीले आफ्नो सम्बोधनमा भने, ‘फैसलाका कतिपय प्रावधान र भाषाशैलीले लोकतन्त्रप्रति विश्वास राख्ने सबैलाई चिन्तत तुल्याएको छ । यो फैसलाको समयले अग्‍निपरीक्षा लिनेछ ।’

२०४६ सालपछि देखिएका राजनीतिक विकृतिका विभिन्न स्वरुपहरू देखेको भन्दै त्यसको पुनरावृत्ति हुने चिन्ता उनले व्यक्त गरे ।