इन्द्रले एउटा विशाल महल बनाउने योजना बनाए । उनले एक विश्वकर्मालाई भवन बनाउन भने । विश्वकर्माले आफ्नो सम्पूर्ण क्षमता प्रयोग गरेर अत्यन्त सुन्दर महल तयार पारे । इन्द्र अत्यन्तै खुशी भए ।

उनले नारदलाई बोलाएर आफ्नो महल देखाउँदै भने— ‘तपाइँले पूरै ब्रह्माण्डको चक्कर लगाउनु हुन्छ । के यस्तो महल कतै देख्नुभएको छ ?’

नारदले भने— यसबारेमा तपाइँलाई सही जानकारी लोमश ऋषिले दिन सक्नुहुन्छ । किनभने उहाँको उमेर एक हजार वर्षभन्दा धेरै भइसक्यो ।

इन्द्र नारदलाई लिएर लोमश ऋषिसमक्ष पुगे ।

इन्द्रले लोमश ऋषिलाई त्यही प्रश्न सोधे— ऋषिवर, के मेरो नयाँ महलजस्तो विगतमा तपाईंले कतै देख्नुभएको छ ?

लोमशले उत्तर दिए— इन्द्र, मैले अतीतमा अनेक इन्द्रको महल देखेको छु । एकभन्दा एक राम्रो र गगनचुम्बी । तिनका अगाडि तपाईंको यो महल फिका छ । राजन ! संसारमा केही पनि अन्तिम र अद्वितीय छैन । त्यसैले सर्वश्रेष्ठको अहंकार पाल्नु मूर्खता हो ।

साभार : ‘विश्वका उत्कृष्ट प्रेरक प्रसङ्गहरु’ पुस्तकबाट