काठमाडौं– बैतडीका कवि एवं गजलकार कर्ण दयालको कवितासंग्रह ‘बेवारिसे लौरो’ र गजलसंग्रह ‘लकडाउन’ सार्वजनिक भएका छन् ।

कवि दयालका अनुसार कवितासंग्रहमा सामाजिक, सांस्कृतिक, आर्थिक, नैतिक एवं राजनीतिक पक्षका भोगाई समेटिएका छन् ।

यो संग्रहमा पछिल्लो तीन वर्षयता रचना गरिएका विविध भावका ३९ वटा कविता समाविष्ट छन् ।

गजलसंग्रह ‘लकडाउन’ विश्वव्यापी रुपमा फैलिएको कोरोना भाइरस (कोभिड– १९) महामारीमाझ लेखिएको हो ।

संग्रहमा गजलमार्फत कोभिड नियन्त्रणका लागि विश्व नै लकडाउनमा जानुपरेको, त्यसले जनजीवन अस्तव्यस्त बनाएको र नेपालमा त्यसले पारेको असर र प्रभावका भाव व्यक्त गरिएको छ ।

दयालका यसअघि पनि ‘आमनेसामने’ लगायत चारवटा गजलकृति प्रकाशित भइसकेका छन् । ‘बेवारिसे लौरो’ र ‘लकडाउन’ सम्पादन हाउसको सहकार्यमा काठमाडौंबाट युरेका पब्लिकेशनले बजारमा ल्याएको हो । सम्पूर्ण किताब वितरक रहेको दुवै कृतिको मूल्य दुई सय रुपैंयाँ छ ।