काठमाडौँ– नेकपा एमालेका वरिष्ठ नेता माधवकुमार नेपालले सर्वोच्च अदालतको परमादेशबाट प्रधानमन्त्री बन्न लागेका कांग्रेस सभापति शेरबहादुर देउवालाई सरकार गठन गर्दा सबैलाई समेट्न आग्रह गरेका छन् ।

सर्वोच्चको फैसलापछि आगामी रणनीति तय गर्न बसेको विपक्षी गठबन्धनको बैठकमा नेता नेपालले देउवालाई सक्षम सरकार बनाउन आग्रह गर्दै शुभकामना दिएका हुन् । उनले संविधान र लोकतन्त्र रक्षाको लडाइँमा आफ्नो सधैँ सहयोग रहने भन्दै जनताका समस्या समाधान गर्न सक्षम सरकार बनाउन आग्रह गरे ।

बैठकपछि एमाले नेता रघुजी पन्तले वरिष्ठ नेता नेपालले बैठकमा राखेको धारणा उधृत गरेर पत्रकारहरुलाई भने ‘संविधान, लोकतन्त्र र विधिको लागि मैले सधैँ लड्दै आएको छु । शेरबहादुरजीले सबैलाई समेटेर लैजानु पर्नेछ । बदलिएको परिस्थितिमा नेकपा एमालेसंग पनि पर्याप्त छलफल गरेर सहकार्यसहित अगाडि बढ्नुहुने विश्वास लिएको छु ।’

बैठकमा सरकार गठन र सत्ता बाँडफाडका विषयमा छलफल भएको थियो ।