काठमाडौं– सर्वोच्च अदालतले प्रधानमन्त्री केपी शर्मा ओलीले दोस्रोपटक गरेको प्रतिनिधिसभा विघटन बदर गरेपछि राजनीतिक माहोल तातेको छ । यो माहोल सामाजिक सञ्जालमा उस्तै गरमागरम बनेको छ ।

अदालतको आदेशका पक्ष र विपक्षमा सामाजिक सञ्जालमा विभिन्न किसिमका प्रतिक्रिया आइरहेका छन् । यही परीप्रेक्ष्यमा बलिउड अभिनेत्री तथा नेपाली चेली मनीषा कोइरालाले ट्वीटरमा एक ट्वीट गरेकी छन् ।

‘अब कसले निर्णय लागू गर्नेछ ?’ उनले ट्वीट गरेकी छन् । उनको यो ट्वीट सर्वोच्च अदालतको आदेशप्रति लक्षित थियो भन्ने प्रष्ट बुझ्न सकिन्छ ।

मनीषा नेपाली राजनीतिमा पनि चासो राख्छिन् । जननिर्वाचित नेपालका पहिलो प्रधामन्त्री वीपी कोइरालाकी नातिनी मनीषाले ट्वीटरमार्फत लिम्पियाधुरा, लिपुलेक र कालापानी समेटेर नेपालको नयाँ राजनीतिक नक्सा सार्वजनिक गर्न सरकारले गरेको निर्णयलाई समर्थन गरेकी थिइन् ।

उनको यो समर्थनप्रति नेपालमा स्वागत गरिए पनि भारतीय सञ्चारमाध्यमले तिखो आलोचना गरेका थिए ।