मुम्बई(एबीपी लाइभ)– अभिनेता सुनील शेट्टीको दक्षिण मुम्बईस्थित अल्माउण्ट रोडमा रहेको पृथ्वी अपार्टमेन्ट सिल गरिएको छ । यो अपार्टमेन्टमा कोरोनाको पाँच सक्रिय केस भेटिएपछि बीएमसीले अपार्टमेन्ट सिल गरेको हो ।

बीएमसीका सहायक कमिश्नर प्रशान्त गायकवाडले कोरोनाका कारण अपार्टमेन्ट दुई दिन सिल गरिने पृष्टि गरे । यो अपार्टमेन्ट विश्वकै सबैभन्दा महंगो क्षेत्रमा रहेको अपार्टमेन्टका रुपमा चिनिन्छ ।

सुनील पछिल्लो कैयौं वर्षदेखि यो अपार्टमेन्टमा बस्दै आएका छन् । जहाँ उनीसँग उनकी पत्नी माना, अभिनेत्री छोरी आथिया र अभिनेताका रुपमा फिल्ममा डेब्यू गर्न लागेका छोरा अहान बस्छन् ।

बीएमसीले अभिनेताको परिवार कसैलाई पनि कोरोना संक्रमण नभएको उल्लेख गरेको छ । सुनीलका प्रवक्ताले पनि यो कुराको पुष्टि गरेका छन् ।