काठमाडौँ– नेपाल कम्युनिष्ट पार्टी एमालेका विभिन्न जनवर्गिय संगठनले नेपाली काँग्रेसका वाग्मती प्रदेश सांसद नरोत्तम वैद्यलाई कारबाही गर्न माग गर्दै गृहमन्त्री खगराज अधिकारीलाई ज्ञापन पत्र बुझाएका छन् ।

एमालेका विभिन्न १५ वटा जनवर्गिय संगठनले वैद्यलाई कारबाही गर्न माग गर्दै गृहमन्त्री अधिकारीलाई पत्र बुझाएका हुन्।

ज्ञापनपत्र बुझ्दै गृहमन्त्री अधिकारीले कानून कार्यान्वयन गर्दा व्यक्तिको ओहोदा नहेरी संविधान र कानुनले दिएको अधिकार प्रयोग गर्ने बताए । गृहमन्त्री अधिकारीले कानुन अनुसार कारबाहीका लागि निर्देशन दिने प्रतिबद्धता व्यक्त गरेका छन् ।

वैद्यले प्रधानमन्त्री केपी शर्मा ओलीको ज्यान सुरक्षामाथि धावा बोलेको भन्दै फौजदारी कसुरमा मुद्दा चलाउन जनवर्गिय संगठनले माग गरेका छन् ।

वैद्यले प्रदेश सभाको बैठकमा प्रधानमन्त्रीको हत्या गर्नका लागि आफू नाथुराम गोड्से बन्न तयार रहेको अभिव्यक्ति दिएका थिए । सो अभिव्यक्तिपछि वैद्यको चौतर्फी आलोचना हुनुको साथै कारबाही हुनुपर्ने माग उठिरहेको छ ।

वैद्यले भने शनिबारको प्रदेश सभा बैठकमा आफ्नो अभिव्यक्तिको आत्मालोचना गर्दै फिर्ता लिइसकेका छन् ।

हेर्नुहोस् भिडियो