दोहा– रोजगारीका लागि नेपाली श्रमिकहरुको प्रमुख गन्तव्य रहेको साउदीले कोरोना भ्याक्सिनको सहज र सुलभ उपलब्धताका लागि सेहहाटी(sehhaty) नामक एप सञ्चालनमा ल्याएको छ ।

अब यो एप डाउनलोड गरी साउदी नागरिक तथा आप्रवासी श्रमिकहरुले पनि सहजै कोरोना भ्याक्सिनका लागि आफ्नो नाम दर्ता गरी निशुल्क भ्याक्सिन लगाउन सक्ने भएका छन् ।

साउदीको स्वास्थ्य मन्त्रालयका अनुसार एपमै आफू नजिकको भ्याक्सिन सेन्टर, अनुकुल मिति र समय रोजेर अपोइन्टमेन्ट बुक गर्न सकिने जनाएको छ ।

बुक गरिएको अस्पतालको लोकेशन लिंक उपलब्ध हुनेछ । साथै दोस्रो डोज लिन पाइने मिति र समय पनि दर्ता गरेपछि एकैसाथ प्राप्त हुने मन्त्रालयले जनाएको छ ।

मन्त्रालयले सार्वजनिक र निजी क्षेत्रहरूमा स्वास्थ्य सेवा प्रदायकहरूको सहभागितासहित राज्यका सबै क्षेत्रमा थप खोप केन्द्रहरू सुरु गर्न खोजेको जनाएको छ ।

गत डिसेम्बरदेखि शुरू भएको राष्ट्रिय खोप अभियानको विस्तारका लागि देशभरिका अल-दावा फार्मेसीहरू र अन्य फार्मेसीहरूमार्फत पनि कोरोना खोप उपलब्ध हुने साउदीका स्वास्थ्य मन्त्री डा. तौफिक अल-रबियाहलाई उदृत गर्दै स्थानीय संचार माध्यमले जनाएको छ ।

मन्त्रालयको कल सेन्टर नम्बर ९३७ मा सम्पर्क गरी भ्याक्सिनको बारेमा कुनै पनि किसिमको जिज्ञासा राख्न सकिने मन्त्रालयले जनाएको छ ।

यसअघि साउदी सरकारले ६० वर्षमाथिका र अग्र भागमा रहेर कोरोनाविरुद्ध काम गरिरहेकाहरुलाई मात्र खोप उपलब्ध गराउँदै आएको थियो ।

साउदी सरकारको यो निर्णयसँगै अब नेपाली श्रमिकले पनि सहज रुपमा खोप पाउने छन् ।