दोहा- कतारमा सामाजिक दूरी लगायतका कोभिड-१९ प्रोटोकलको पालना नगरी भिडभाड गर्ने सफारी मल लगायतका ६ व्यापारिक केन्द्रमाथि कारबाही गरिएको छ ।

कतारको वाणिज्य र उद्योग मन्त्रालयले कोभिड-१९ प्रोटोकलको पालना नगर्ने व्यापारिक प्रतिष्ठानलाई कारबाही गर्दै बन्द गराएको हो ।

मन्त्रालयका अनुसार बन्द गरिएका महल तथा पसलहरूमा पर्ल-कतार, अल वाक्राको होम सिटी, अबु हम्मूरको सफारी मल्ल, ऐन खालिदमा डाइटर परामर्श, सौक वाकिफको एन्नाबी क्याफेटेरिया ९२ र पुरानो एयरपोर्ट क्षेत्रको अल रवानाक ट्रेडिंग कम्पनी रहेका छन ।

मन्त्रालयले यस अघि नियम उलङ्घन नियन्त्रण गर्न आफ्नो निरीक्षण अभियान तीव्र पार्ने बताइसकेको थियो ।

मन्त्रालयले सबै नागरिक र बासिन्दालाई दर्ता र व्यावसायिक इजाजतपत्र, वा सावधानी र रोकथाम उपायहरूको उल्लंघन गरेको देखेमा मन्त्रालयलाई रिपोर्ट गर्न समेत आग्रह गरेको छ ।

कतारले कोरोना संक्रमण बढेसँगै यस अघि जारी भएका कोभिड सुरक्षा सावधानीका नियमहरू गत हप्ता देखि पुनः लागू गरिसकेको छ ।

सरकारले जारी गरेको ३२ बुँदे सूचना पूर्ण रुपमा पालना गर्न कतारमा कार्यरत रहेका नेपाली समुदायलाई नेपाली दूतावासले समेत अनुरोध गरेको छ ।