जनकपुरधाम– धनुषामा भिनाजुको हत्या गरेको आरोपमा प्रहरीले एक जनालाई पक्राउ गरेको छ ।

शुक्रबार प्रहरीले ५४ वर्षीय प्रमोद रेग्मीको हत्या आरोपमा उनको सालो निरज खातीलाई पक्राउ गरेको हो । धनुषा प्रहरीले पत्रकार सम्मेलन गरी निरजलाई सार्वजनिक गरेका हो ।

व्यवसायी रहेका रेग्मीको गत माघ १३ गते क्षिरेशवरनाथ नगरपालिका ७ स्थित कोठामा हत्या भएको थियो । मृतक रेग्मी उदयपुर त्रियुगा नगरपालिकाका बासिन्दा हुन् ।

उनले क्षिरेश्वरनाथ नगरपालिकामा व्यवसाय गर्दै आएका थिए ।

निरजले सेयर लगानी सम्बन्धीको विवादमा रिसईबी राखी अत्याधिक मदिरा सेवन गराई हत्या गरेको प्रहरी अनुसन्धानबाट खुलेको छ ।

रेग्मी मदिरा सेवन गरी मातेपछि निरजले लठीले टाउँको प्रहार गरी हत्या गरेको अनुसन्धानबाट खुलेकाे धनुषाका प्रहरी उपरीक्षक प्रकाश राना भट्टले जानकारी दिए ।

पक्राउ परेका निरजलाई अदालतबाट म्याद थप गराई विस्तृत अनुसन्धान भइरहेको उनको भनाइ छ।