धनुषा– कोरोना भाइरस संक्रमण महामारीको मौका छोपी अक्सिमिटरको कालोबजारी गरेको आरोपमा प्रहरीले धनुषाको जनकपुर उपमहानगरपालिका–९ बाट एक जना सर्जिकल स्टोरका संचालकलाई पक्राउ गरेको छ ।

प्रहरीका अनुसार पक्राउ पर्नेमा स्थानीय बिनिता सर्जिकल स्टोरका सञ्चालक ३० वर्षीय भुपनारायण शाह छन् । सिरहाको शुखिपुर नगरपालिका घर भएका उनले जनकपुरस्थित बाह्रविगाहामा सर्जिकल स्टोर सञ्चालन गर्दै आएका थिए । प्रहरीले सो स्टोरबाट २८ थान पल्स अक्सिमिटर बरामद गरेको छ ।

जिल्ला प्रहरी कार्यालय धनुषाका प्रमुख एसपी प्रकाश रानाभाटका अनुसार उनले १ हजार ७ सय पर्ने पल्स अक्सिमिटर ३ हजारसम्ममा बेच्ने गरेको खुलेको छ ।

शाहलाई अहिले प्रहरीले कालोबजारी र संक्रामक रोग ऐन–२०२० अनुसार प्रमुख जिल्ला अधिकारीबाट म्याद लिएर थप अनुसन्धान गरिरहेको छ ।