काठमाडौँ– नेकपा अध्यक्ष प्रचण्डले रामकुमारी झाँक्री पक्राउ गरेर केपी ओली नेतृत्वको सरकारले आफ्नो चरित्र देखाएको बताएका छन् ।

पार्टी कार्यालय पेरिसडाँडामा आयोजित नेपाल मगर संघको भेलालाई सम्बोधन गर्ने क्रममा अध्यक्ष प्रचण्डले ओली सरकारले हिजो नै झाँक्रीलाई पक्राउ गर्न खोजेको तर आफुहरुले जोगाएको समेत बताए ।

उनले भने, ‘राष्ट्रपतिको बारेमा बोलेको भन्दै हिजो नै पक्राउ गर्न खोजेको थियो तर हामीले जोगायौं । तर आज पक्राउ गरेको खबर आएको छ । यसबारेमा पार्टीले छिटै निर्णय गर्नेछ ।’

अहिले सरकारले संघीयता गणतन्त्र र धर्मनिरपेक्षतामाथि नै प्रहार गर्न खोजेको भन्दै उनले उत्पिडित जातिमाथिसमेत सरकार जाइलागेको आरोप लगाए । त्यसकै प्रमाण स्वरुप झाँक्री पक्राउ गरिएको उनको भनाइ छ ।

उनले भने, ‘रामकुमारी झाँक्री पक्राउ गर्नु भनेको कम्युनिष्ट पार्टीको निम्ति चुनौती हो । उनीहरुले उत्पिडित जातिमाथि हमला गर्न खोजेका छन् । उहाँ त छिटै मुक्त हुनुहोला । तर यो भनेको लोकतन्त्रमाथि नै प्रहार हो । यसलाई सफल हुन दिने छैनौँ।’