मोरङ- मोरङको विराटनगर र उर्लाबारीबाट ब्राउन सुगरका चार कारोबारीलाई प्रहरीले पक्राउ गरेको छ ।

विराटनगरबाट एक जना भारतीय नागरिकसहित दुई युवा र उर्लाबारीबाट एक युवतीसहित दुई जना पक्राउ परेको मोरङ प्रहरी प्रमुख एसपी सन्तोष खड्काले बताए ।

उनका अनुसार उर्लाबारी नगरपालिका–६ मा रहेको होटल ह्याभन भ्यालीबाट मोरङको रतुवामाई नगरपालिका–१० का धजेन्द्र भट्टराई र मिक्लाजुङ गाउँपालिका–४ की २० वर्षीया कविता लिम्बू पक्राउ परेका छन् । उनीहरुको साथबाट प्रहरीले १४ ग्राम ब्राउन सुगर फेला परेको छ ।

विराटनगर महानगरपालिका–१० शान्ति चोकबाट पनि प्रहरीले ब्राउन सुगरसहित दुई युवालाई पक्राउ गरेको छ ।

पक्राउ पर्नेमा सप्तरीको हनुमाननगर कंकालिनी नगरपालिका–६ का २२ वर्षीय धमेन्द्र रजक र भारत अररीयाका २२ वर्षीय मोहम्द अफरोज रहेका छन् ।

उनीहरूका साथबाट चार ग्राम ५९० मिलिग्राम ब्राउन सुगर बरामद भएको एसपी खड्काले बताए ।