मुम्बई(एबीपी लाइभ)– अभिनेत्री करिना कपूर खान आफ्नो फिल्मी करियरमा नयाँ यात्रा सुरु गर्दैछिन् । फिल्म उद्योगमा झण्डै २० वर्ष बिताएकी यी अभिनेत्री अब निर्माताका रुपमा दर्शकमाझ आउदैछिन् ।

करिना निर्मात्री एकता कपुरसँग सहकार्य गर्दै एक थ्रिलर फिल्म बनाउदैछिन् । जसको निर्देशन हंसल मेहताले गर्नेछन् । फिल्मको नाम फाइनल भइसकेको छैन ।

‘एकताका साथ यो फिल्ममा एक निर्माताको रुपमा काम गर्न उत्साहित छु । म हंसलको फिल्मको ठूलो प्रशंसक हुँ । उनीसँग पहिलोपटक काम गर्न पाउनु मेरा लागि विशेष हुनेछ । म यो सहकार्यका लागि अझ बढी प्रतिक्षा गर्ने छैन’, करिनाले भनेकी छन् ।

करिनाले इन्स्टाग्राममा एकता र हंसलका साथ एक फोटो शेयर गरेकी छन् । फिल्ममा करिना आफैं प्रमुख भूमिकामा देखिँदैछिन् । फिल्म एक सत्यकथामा आधारित हुनेछ । यूकेमा छायांकन हुने फिल्मका लागि सबै तयारी पुरा भइसकेको छ ।

कपूर परिवारमा करिना पहिलो छोरी हुनेछिन्, जो आधिकारिक रुपमा फिल्म निर्माणमा जोडिँदैछिन् । करिनाले एकताको फिल्म ‘वीरे दी वेडिङ’मा प्रमुख भूमिकामा अभिनय गरिसकेकी छन् ।

छोरा तैमूरको जन्मपछि करिनाले यो फिल्ममार्फत ठूलो पर्दामा पुनरागमन गरेकी थिइन् । अहिले दोस्रो छोरा जेहको जन्मपछि करिना पुनः एकताको फिल्मबाट ठूलो पर्दामा फर्किन लागेकी हुन् ।

एकताले पनि करिनासँग पुनः सहकार्य गर्न पाउँदा खुशी व्यक्त गरेकी छन् । ‘करिना कपुर खान स्टार पावर र प्रतिभाको डाइनामाइट कम्बिनेसन हो । पछिल्लो पटक ‘वीरे दी वेडिङ’मा सहकार्य गरेका थियौं । जुन सायद कुनै फिमेल स्टारको सबैभन्दा हिट फिल्म हुनसक्छ । हाम्रो समयको उत्कृष्ट फिल्म निर्देशकमध्ये एक हंसल मेहताले यसको कथा बताउनु आफैंमा अझ रोमाञ्चक हुनेछ’, एकताले भनेकी छन् ।