मुम्बई(बलिउड हंगामा)– सन् २०१९ को हिट फिल्म ‘ड्रिम गर्ल’को सिक्वेल बन्ने भएको छ । आयुष्मान खुराना र नुसरत भारुचाको अभिनय रहेको यो फिल्मको निर्माता एकता कपुर र लेखक तथा निर्देशक राज सान्धिल्य हुन् ।

यो फिल्मले दर्शकलाई सन् ९० को दशकका अभिनेता गोविन्दाको स्मरण गराइदिएको थियो । फिल्मले बक्सअफिसमा १ सय ४२ दशमलब २६ करोडको व्यापार गरेको थियो ।

‘ड्रिम गर्लले थिएटरमा मात्र होइन, टेलिभिजनमा पनि सफलता पाएको थियो । यो फिल्मलाई दर्शकले दोहोर्याएर हेरेका थिए । त्यहीकारण पनि निर्माताहरु यसको सिक्वेलको तयारीमा जुटेका छन्’, फिल्म निकट स्रोतले भनेको छ ।

निर्देशक राज यतिबेला फिल्मको स्क्रिप्टको तयारी गरिरहेका छन् । उनी अर्को फिल्मका लागि पनि स्क्रिप्ट लेख्न व्यस्त छन् । फिल्मको सिक्वेलमा निर्माण पक्षले आयुष्मानलाई नै अभिनय गराउने पक्कापक्की जस्तै भइसकेको छ ।