निजी क्षेत्रका संस्थामा काम गर्ने अधिकांश कर्मचारीले हाकिमले कुरा नसुन्ने र कार्यालयमा हुने विभिन्न प्रकारका कडाइका बारेमा गुनासो गर्छन् । कार्यालयमा हुने कामको चापमा हाकिमले लगाउने अनौठो नियमका कारण ती क्षेत्रमा काम गर्ने कर्मचारी आजित हुन्छन् । यस्तैमा एक संस्थामा हाकिमले जारी गरेको अनौठो नियम अहिले चर्चामा छ ।

सामाजिक सञ्जाल रेडिटमा एक पोस्टर भाइरल बनेको छ । यस पोस्टरमा एक संस्थाका हाकिमले आफ्नो कार्यालउका कर्मचारीलाई कार्यालयमा मोबाइल चार्ज गर्न प्रतिबन्ध लगाएका छन् । यसका साथै ती हाकिमले कुनै पनि कर्मचारीले कार्यालयमा मोबाइल चार्ज गरेमा तलब काट्ने चेतावनी समेत दिएका छन् ।

भाइरल पोस्टरमा लेखिएको छ, कोही पनि कर्मचारीले कार्यालयमा आफ्नो मोबाइल फोन वा कुनै पनि प्रकारको विद्युतीय उपकरण चार्ज नगर्नुहोस् । अन्यथा यसलाई बिजुली चोरी मानिने छ । जो कोही कर्मचारीले यसो गर्छन् उसको तलबमा कटौती गरिने छ । त्यसैले कार्यालयमा आफ्नो फोन स्विच अफ राख्नुहोस् ।

यो पोष्टर साामाजिक सञ्जालमा भाइरल बनेको छ । अधिकांश सामाजिक सञ्जालका प्रयोगकर्ताले ती हाकिमको आलोचना गरेका छन् । यस्तै कतिपयले फोन चार्ज गर्नु बिजुली चोरी हुने भए कर्मचारीलाई ओभरटाइम गराउनु पनि बिजुलीको गलत प्रयोग हुने तर्क गरेका छन् ।