काठमाडौं– सञ्चारकर्मी तथा निर्देशक लक्ष्मण सुवेदीको नयाँ सट फिल्म ‘गहना’ एक्शन कट नेपाल युट्युब च्यानलमा रिलिज भएको छ । फिल्ममा तीजमा गहना नहुँदा माइत जान नसकेकी पत्नीका लागि पतिले कतिसम्म जोखिम मोल्छन् भन्ने कुरा देखाइएको छ ।

करिब ३२ मिनेटको ‘गहना’ मा गहनाका लागि पतिपत्नीको द्वन्द्व देखाइएको छ । फिल्ममा बेरोजगारी, आर्थिक अभाव र सामाजिक देखासिकीको पाटोलाई प्राथमिकता दिइएको छ । निर्देशक सुवेदीले पहिलो भागमा सस्पेन्स छोडिएको फिल्म तेश्रो भागसम्म निर्माण हुने बताए ।

फिल्ममा नरेन खड्का, साया भण्डारी र पुरन थापाको अभिनय छ । निर्देशक सुवेदीकै लेखन रहेको फिल्ममा विमल ढकालको छायांकन, विनय पौडेलको मुख्य सहायक निर्देशन, ललितसिंह साउदको सम्पादन, विनोद भुजेलको पाश्र्वसंगीत छ ।

दिलासा क्रिएसनको ब्यानरमा श्रीदेवी, दिलासा र सारा सुवेदी निर्माता रहेको फिल्म काठमाडौं आसपासमा खिचिएको हो ।