काठमाडौँ– मोरङ जिल्लास्थित रतुवामाई खोलामा आएको बाढीले बाँध फुटाउँदा सिजुवा गाउँका करिब २० घर डुबानमा परेका छन् ।

रतुवामाई नगरपालिका ७ राजाबासास्थित रतुवामाई खोलामा बिहीबार आएको बाढीले बाँध फुटेर बस्तीमा पसेपछि डुबान परेका २० घरपरिवालाई सशस्त्र प्रहरीले सुरक्षित स्थानमा सारेको छ ।

सशस्त्र प्रहरी बल नेपाल सुरक्षा बेस सौठाबाट सशस्त्र प्रहरी निरीक्षक सिताराम पौडेलको कमाण्डमा गएको टोलीले उनीहरू उद्धार गरेको हो ।

यसैगरी झापा जिल्लाको झापा गाउँपालिका १ मिलन बस्तीमा वर्षाको कारण माईखोलामा आएको बाढी पस्दा डुबान परेका करिब ८५ घरपरिवारलाई सशस्त्र प्रहरीले सुरक्षित स्थानमा सारेको छ ।

सशस्त्र प्रहरी बल नेपाल फरवार्ड सुरक्षा बेस सालमाराबाट सशस्त्र प्रहरी नायव निरीक्षक पुण्यप्रसाद विमलीको कमाण्डमा खटिएको टोलीले डुबानमा परेका घरपरिवारलाई सोही ठाउँ नजिकै रहेको सितुमाडी प्राथमिक विद्यालयको भवनमा सुरक्षित स्थानान्तरण गरेको हो ।