कास्की– विश्वको दोस्रो अग्लो शिखर केटू हिमालको आरोहण गरी कीर्तिमानी राखेको नेपाली टोलीलाई पोखरामा सम्मान गरिएको छ ।

पोखरा पर्यटन परिषदले केटू हिमाल र धम्पुस पिक हिमाल आरोहीलाई नगर परिक्रमा सहति सम्मान गरेको हो ।

केटु हिमाल (८६११ मिटर) को नेपालका १० जना पर्वतारोहीले यही माघ ३ गते शनिबारका दिन सफल आरोहण गरी इतिहास रचेका थिए ।

विश्वमै नेपालको नाम उचो राखेको खुसियालीमा उनीहरूको हौसला स्वरुप सम्मान गरिएको परिषद्का अध्यक्ष गोपीबहादुर भट्टराईले बताए ।

निर्मल पुर्जा आरोहण दलको टिममा मिङमा डेविट शेर्पा, मिङमा तेन्जी शेर्पा, ग्याल्जेन शेर्पा र पेम चिरी शेर्पाले माउन्ट केटूको सफलतापूर्वक आरोहण गरेका थिए ।

त्यसैगरी दावा तेम्बा शेर्पा र अर्को आरोहण दलमा मिङमा जी शेर्पा ,दावा तेन्जीङ शेर्पा, किलु पेम्बा शेर्पा थिए भने सेभेन समिट नामको आरोहणबाट सोना शेर्पाले सफल आरोहण गरेका थिए ।