एजेन्सी- दक्षिण अफ्रिकाले अक्सफोर्ड-आस्ट्राजेनेकाले बनाएको कोरोना भाइरसविरुद्धको खोप लगाउन रोक लगाएको छ ।

कोरोनाभाइरसको नयाँ प्रकारविरुद्ध सो खोपको नतिजा प्रभावकारी नभएपछि त्यसको प्रयोग रोकिएको दक्षिण अफ्रिका सरकारले जनाएको छ ।

वैज्ञानिकहरूका अनुसार दक्षिण अफ्रिकाका नयाँ सङ्क्रमितमध्ये ९० प्रतिशत नयाँ प्रकार वा भेरीअन्टबाट प्रभावित रहेको पाइएको छ।

अक्सफोर्ड-आस्ट्राजेनेकाको खोपले उक्त प्रकारको कोभिड-१९ का हल्का तथा मध्यम खालका बिरामीलाई पनि खास काम नगरेपछि रोक लगाइएको बीबीसीले जनाएको छ ।

दुई हजार हाराहारी मानिस सम्मिलित एउटा अध्ययनले सो खोपको प्रभावकारिता नभएको पुष्टि गरेको जनाइएको छ ।

दक्षिण अफ्रिकाले अक्सफोर्ड-आस्ट्राजेनेकाको खोपको १० लाख मात्रा प्राप्त गरिसकेको थियो । आगामी सातादेखि खोप अभियान थाल्ने तयारी भइरहेका बेला प्रभावकारितामा प्रश्न उठाउँदै खोप लगाउन नै रोक लगाइएको हो ।