काठमाडौं– गायकद्वय नकुल थापा र विष्णु थापाको स्वरमा रहेको लोकदोहारी भाका ‘ढल्की जाला त्यो लाली जोवन’ सार्वजनिक भएको छ । भाकामा गायकद्वयकै शब्द छ । गायकद्वयलाई स्वरमा गायिकाहरु प्रतिमा अर्याल र रीता पौडेलले साथ दिएका छन् ।

नकुल र विष्णुको गृह जिल्ला सिन्धुपाल्चोकस्थित सुनकोशी नदी तथा धार्मिक एवं पर्यटकिय गन्तव्य बलेफीलाई केन्द्रित गरी गायकहरुले भाका तयार पारेका हुन् ।

भिडियोमा मोडलहरु सञ्जिव ठकुरी र अस्मिता आचार्यका साथमा बाल कलाकारहरु निश्चल जंग थापा र गृष्मा थापा मगरले अभिनय गरेका छन् ।

त्रिपुरा म्युजिक युट्युव च्यानलमार्फत सार्वजनिक गरिएको गीतको म्युजिक भिडियो श्रीकाली चौरमा छायांकन गरिएको छ । शिशिर बुढाथोकीको निर्देशन र कोरियोग्राफी रहेको म्युजिक भिडियोमा ड्रोनबाट छायांकन गरिएको सु्नकोशी नदी, बलेफी र त्यस आसापासका स्थान समेटिएको छ ।

त्रिपुरा म्युजिक नेपालले उत्पादन तथा वितरण गरेको गीतको म्युजिक भिडियोमा दीपक गिरीको छायांकन, रोशन धितालको सम्पादन र रामचन्द्र बस्नेतको ड्रोन रहेको छ । गीतको संगीत संयोजन पवन वाङ लामाले गरेका छन् ।