काठमाडौं–अभिनेता आमेश भण्डारीले दिवंगत पिता लकी भण्डारीको सम्झनामा ‘बाबा’ बोलको गीत सार्वजनिक गरेका छन् । कुशे औंशी अर्थात् बुवाको मुख हेर्ने दिनको अवसर पारेर मंगलबार उनले गीत सार्वजनिक गरेका हुन् ।

गीतमा आमेशकै स्वर, शब्द र संगीत रहेको छ । भिडियोमा आमेश, निर्देशक शोभित बस्नेत र बाल कलाकार अवश्य भण्डारी फिचर्ड छन् । शोभितले आमेशको पिताको भूमिका निर्वाह गर्दा अवश्यले आमेशको बाल्यकालको चरित्र निभाएका छन् ।

आमेशको पिताको यसै वर्ष निधन भएको थियो । गीतको भिडियोमार्फत उनले पिताले आफूलाई गर्ने प्रेम देखाएका छन् । गीतका शब्द निकै मर्मस्पर्शी छन् । भिडियोमा पिता र सन्तानबीचको भावनात्मक सम्बन्धलाई निकै मनछुने ढंगबाट देखाइएको छ ।

सुरेश न्यौपानेको कन्सेप्ट र निर्देशन रहेको भिडियोमा संकल्प भुजेलको छायांकन, दिन्सन शाहको सम्पादन र कलर, करिश्मा केसीको आर्ट डिरेक्सन, केवलमान सिंह बस्नेतको प्रोडक्सन र सलोन बस्नेतको क्रिएटिभ हेड छ ।

आमेशले यसअघि ‘मेरो लागि तिमी’, ‘रुम नम्बर १०८’ गीत पनि गाइसकेका छन् । ‘फूलै फूलको मौसम तिमीलाई’ बाट नायकको रुपमा डेब्यू गरेका उनले ‘तँ म र ऊ’ र ‘मेला’ चलचित्रमा पनि अभिनय गरेका छन् ।