मुम्बई(एबीपी लाइभ)– बलिउड अभिनेत्री नुसरत भरुचालाई ‘वर्टिगो अट्याक’ भएको छ । फिल्म ‘लभ रञ्जन’को सेटमा बेहोस भएपछि उनलाई तुरुन्तै अस्पताल भर्ना गरिएको थियो ।

उनी विगत ७ दिन यता निकै अस्वस्थ थिइन् । सुटिङ सेटमा उनी निकै असजिलोका साथ उभिएर कुराकानी गर्थिन् । उनलाई सेटबाट अस्पताल लगिएको थियो । उनलाई अस्पताल पुर्याउञ्जेलसम्म उनको परिवारलाई खबर गरिएको थिएन ।

फिल्मका निर्माताका अनुसार नुसरत २३–२४ दिनदेखि फिल्मको काम निकै राम्रो किसिमले गरिरहेकी थिइन् । तर अचानक रिंगटा चलेर लडेपछि सुटिङ रोकिएको थियो ।

फिल्मको काम अहिले किन पनि रोकिएको छ भने फिल्मका अधिकांश दृश्यमा नुसरत अनिवार्य हुनुपर्नेछ । अभिनेत्री नुसरतले आफूलाई तनावका कारण स्वास्थ्यमा समस्या आएको जानकारी डाक्टरले दिएको बताएकी छन् । उनले कोभिड महामारीले भावनात्मक, शारीरिक र आर्थिक रुपले जोकोहीलाई असर पारेको भन्दै त्यसको असर आफूमा पनि देखिएको खुलाइन् ।

नुसरतको मुम्बईस्थित हिन्दुजा अस्पतालमा उपचार भएको थियो । उनको रक्तचापमा घटबढ भएपछि उनलाई ह्विलचेयरमा राखिएको थियो । उनलाई डाक्टरले १५ दिन आराम गर्न सल्लाह दिएका छन् ।