दोहा– रोजगारीका लागि मलेसिया गएका तीन नेपाली युवाहरु बेपत्ता भएका छन् । तीन नेपालीका परिवारले उनीहरु बेपत्ता भएको भन्दै खोजी गरिदिन मलेसियास्थित जनउद्धार केन्द्रलाई अनुरोध गरेका छन् ।

स्याङ्जाका गम बहादुर गुरुङ्ग रोजगारीको सिलसिलामा विगत १० बर्ष अगाडि मलेसिया गएको र त्यसपछि उनी अहिलेसम्म परिवारको सम्पर्कमा नआएकोले खोजी गरिदिन गुरुङका परिवारले केन्द्रलाई अनुरोध गरेका हुन् ।

यसैगरी, सिन्धुली घर भएका ध्रुव फुयाल पनि विगत ११ वर्ष अघि त्यहाँ पुगेको र अहिले उनी परिवार तथा आफन्तको सम्पर्कमा नरहेकाले खोजी गरिदिन आफूहरुलाई परिवारले अनुरोध गरेको केन्द्रले जनाएको छ ।

यसैगरी ओखलढुंगाका इन्द्र बहादुर गुरुङ विगत ७ पर्षदेखि परिवार र आफन्तसँग सम्पर्कमा नभएको भन्दै त्यहाँस्थित नेपाली दूतावास जनउद्धार केन्द्र, विभिन्न संघ संस्था लगायत मिडियाहरुलाई भाइ खोजी गरिदिन उनका दाजु मान गुरुङले अनुरोध गरेका छन् ।

उनी २०१४ देखिनै सम्पर्कमा नरहेको, उनले चलाउने फेसबुक पत्ता लागेको भएपनि मान्छेको अवस्था अहिलेसम्म पनि पत्तो नलागेको उनले बताए ।

उनले चलाउने गरेको फेसबुकमा एउटी अपरिचित महिलासँग खिचेको फोटो पनि प्राप्त भएको उनले बताए । बेपत्ता नेपालीलाई कसैले देखेमा खबर गर्न जनउद्धार केन्द्र मलेसियाले अनुरोध गरेको छ ।