मुम्बई(दैनिक भास्कर)– बलिउडका लोकप्रिय निर्माता तथा निर्देशक विक्रम भट्टले दोस्रो विवाह गरेका छन् । उनले गत वर्षको लकडाउनमा श्वेताम्बरी सोनीसँग गुपचुप विवाह गरेका हुन् । विक्रमले बुधबार परेको पत्नी श्वेताम्बरीको जन्मदिनमा उनलाई शुभकामना दिँदै आफूले विवाह गरेको खुलासा गरेका छन् ।

सामाजिक सञ्जालमार्फत विक्रमले श्वेताम्बरीका साथ एक फोटो पनि सार्वजनिक गरेका छन् । जुन पोस्ट सामाजिक सञ्जालमा भाइरल भइरहेको छ ।

विक्रमका सल्लाहकार महेश भट्टले आफूलाई अघिल्लो वर्षको लकडाउनका समयमा विक्रमले फोन गरेर विवाह गर्न लागेको जानकारी दिएको खुलासा गरेका छन् । ‘विक्रमले गत वर्षको सेप्टेम्बरमा लकडाउनको समयमा विवाह गरेका थिए । त्यो बेला उसले मलाई फोन गरेर ‘बोस मेरो विवाह हुँदैछ । विवाह समारोहका लागि आमन्त्रित गर्न लकडाउनमा समस्या छ । यो कोभिडको समयमा तपाईंको स्वास्थ्य सम्बन्धी चिन्तालाई ध्यानमा राख्दै तपाईंमाथि कुनै बोझ दिन्नँ र तपाईंलाई आउनु पनि भन्दिनँ । तर हामी यो विवाहलाई लुकाएरै राख्नेछौं’ भनेपछि मैले उसलाई ‘तिमी बिरालो जस्तो रहेछौ । आँखा बन्द गरेर दुध पिइरहेका छौ । यो आक्रामक मिडिया युग हो । आशा गर्छु कि तपाईंको विवाह लामो समयसम्म नलुकोस’ भनेको थिएँ’, महेशले भनेका छन् ।

विक्रमकी दोस्रो श्रीमति श्वेताम्बरी मुम्बईमा ट्रिनिटी आर्ट ग्यालरीसँग जोडिएकी छन् । महेशका अनुसार पछिल्ला केही महिनामा विक्रम श्वेताम्बरीको शान्त र सकारात्मक आध्यात्मिकताबाट प्रभावित थिए ।

विक्रमको पहिलो विवाह अदिति भट्टसँग भएको थियो । दुवैको एक छोरी कृष्णा छिन् । उनीहरुको सन् १९९८ मा सम्बन्धविच्छेद भएको थियो । त्यसपछि विक्रम केही वर्षसम्म सुस्मिता सेन र अमीषा पटेलसँग प्रेम सम्बन्धमा रहे । अमीषा केही समयसम्म विक्रमसँग लिभ–इन रिलेसनपिमा नै थिइन् ।