मुम्बई(बलिउड लाइफ)– बलिउड अभिनेता पंकज त्रिपाठी पछिल्लो समयमा बलिउडमा रुचाइएका अभिनेतामा पर्छन् । उनले धेरै फिल्म र वेब सिरिजमा आफ्नो अभिनय कौशल देखाइसकेका छन् । यी अभिनेताले आफू अभिनयको शिखरमा पुगिसकेकाले केही समयका लागि विश्राम लिन चाहेको खुलाएका छन् ।

उनी अभिनित पछिल्लो फिल्म ‘मिमी’ले यतिबेला चर्चा पाइरहेको छ । ‘म अभिनयबाट थाकिसकेको छु । म दुईदेखि तीन महिनासम्मका लागि ब्रेक लिन चाहन्छु । त्यसपछि मात्र आफूले बाचा गरेका प्रोजेक्ट पुरा गर्छु । केही समय ब्रेक लिएर आएँ भने म र दर्शकका लागि निराशा हुनेछैन’, उनले भनेका छन् ।

उनले आफूले थोरै रमाइलो, रोचक क्षण र उत्साहित कामका लागि समय छुट्याउन लागेको उल्लेख गरेका छन् । ‘म अन्यबाट मोटिभेसन लिन्छु । मैले थिएटरमा प्रशिक्षण लिँदा पनि यो ज्ञान लिएको थिएँ’, उनले भने ।

पंकजले दर्शकका लागि तथ्यपरक र अर्थपूर्ण विषय आवश्यक रहेकाले आफूले गलत किसिमका सन्देश जाने फिल्ममा अभिनय नगर्ने बताए । उनले देख्दा अभिनय सजिलो भए पनि अभिनय गर्ने कलाकारका लागि यो गाह्रो विषय भएको उल्लेख गरे ।

पंकज आफ्नो प्रमुख काम अभिनय नभई यात्रा र खानु रहेको बताउछन् ।