मुम्बई(आजतक)– टेलिभिजनको विवादित शो ‘बिग बोस’को नयाँ सिजन फ्यानका लागि प्रतिक्षाको विषय बनेको छ । यो शोका लागि प्रतिष्पर्धीको नाम सार्वजनिक हुन थालिसकेको छ ।

१५ औं संस्करणको नयाँ सिजनका लागि अभिनेता सलमान खानकी ‘तेरे नाम’ अभिनेत्री भूमिका चावलाको नाम यतिखेर चर्चामा छ ।

शोका निर्माताहरु नयाँ सिजनमा भूमिकालाई भित्र्याउनका लागि निकै इच्छुक छन् । सिजनका लागि भूमिकालाई प्रस्ताव गरिएको छ । हाल उनीहरुबीच कुराकानी भइरहेको छ ।

भूमिकाका अलावा बलिउडका कैयौं अनुहारलाई पनि प्रस्ताव गरिएको छ । फिल्म ‘तेरे नाम’मा सलमानसँग भूमिकाको केमेष्ट्रीलाई निकै रुचाइएको थियो । फिल्म बक्सअफिसमा हिट साबित भएको थियो ।

तर भूमिकाको करियर बलिउडमा लामो समयसम्म चल्न पाएन । यसपछि भूमिकाले दक्षिण भारतीय फिल्ममा पाइला चालिन् । उनी दक्षिण भारतीय फिल्मको सफल अभिनेत्रीमा चिनिन्छिन् ।

भूमिकाले ‘रन’, ‘दिले ने जिसे अपना कहा’, ‘धोनी बायोपिक’ जस्ता हिन्दी फिल्ममा अभिनय गरेकी छन् । उनी पछिल्लो पटक जी५ को सिरिज ‘भ्रम’मा देखिएकी थिइन् ।