काठमाडौं– अभिनेता राजेश हमालको स्वरमा रहेको गीत ‘मन बुढो भएन’को भिडियो सार्वजनिक भएको छ । बुधवार राजधानीमा एक कार्यक्रमबीच दीपक शर्माको शब्द र संगीत रहेको गीत सार्वजनिक गरिएको हो ।

गीतमा हमालसँगै सुवास पुरी तथा गायिकाद्वय एलिना चौहान र बेनिशा पौडेलको स्वर रहेको छ । देवेन्द्र पाण्डेको निर्देशन रहेको भिडियोमा हमालसँग रेश्मा घिमिरेको अभिनय छ । भिडियोमा उत्सव दाहालको छायांकन र विकास दाहालको सम्पादन छ ।

‘उमेर आफ्नो रफ्तारमा गईरहेपनि मन बुढो भने कहिल्यै हुँदैन । यो गीतको पोस्टर शेयर गरेपछि उमेर धेरै भएका शुभचिन्तकहरुले हौसला मिलेको छ । मलाई पनि लाग्छ मन बुढो कहिल्यै हुँदैन’, हमालले भने, ‘आफ्नो उमेर घटाएर कहिल्यै घट्दैन तर उमेर भन्दा बढि नदेखिन आफ्नो जीवनशैली मिलाउनै पर्छ’ ।