जनकपुरधाम– कमला नदीको दुवै तर्फको बाँध बाढीले कटान हुने जोखिम बढेको छ । शनिबार खोलामा पानीको सतह घट्दै गएपछि सिरहा र धनुषा तर्फको बाँध कटान हुने जोखिम बढेको हो ।

यसवर्ष धनुषातर्फको किरतपुर र ढोलबज्जा नजिक र सिरहाको बसपिट्टा र सारस्वर नजिकको बाँध कटान हुने जोखिम बढेको छ । बाढीले धनुषा तर्फको करिब ३० बिघा जमिन कटान गरिसकेको छ । बाँध नजिक खोलाको पानी पुगिसकेको छ ।

हरेक पटक २/३ वर्षको अन्तरालमा बाढीले सिरहा र धनुषातर्फ तटबन्ध भत्काउने गरेको छ । तटबन्ध भत्काउँदा बाढीले ठूलो क्षति पुर्‍याउँदै आएको छ ।

कमला नदीको धनुषा र सिरहा दुवैतिरको तटबन्धमा भारतले लगानी गरेको छ । स्रोतका अनुसार भारतको दबाबका कारण तटबन्ध मर्मत कार्य भइरहेको छैन ।

‘बाढी आउँदा भारतमा क्षति पुर्‍याउँछ’, एक इन्जिनियरले भने, ‘तर यता तर्फको तटबन्ध भत्कियो भने भारतमा कम क्षति हुन्छ । त्यसैले भारत पक्षले तटबन्ध बलियो गरी बनाउने इच्छा देखाएको छैन ।’ बाँध भत्किने जोखिम बढेपछि स्थानीय त्रसित भएका छन् । ज्यान जोगाउन स्थानीय रात भर जग्राम बस्ने गरेका छन् ।