काठमाडौं– नेपाली ‘पपसम्राट’का रुपमा परिचित गायक ओमविक्रम विष्टको नयाँ गीत ‘उनी आउने’ सार्वजनिक भएको छ । गीतमा ओमकै संगीत छ । हाल अमेरिकामा उपचार पश्चात स्वास्थ्यलाभ लिइरहेका विष्टले यो गीत केहीवर्षअघि नै तयार गरेका थिए ।

म्याक्स टिभी नेपालले निर्माण गरेको गीतको भिडिओमा अमेरिका बस्दै आएका अभिनेता राजबल्लभ कोइरालाले अभिनय गरेका छन् । भिडियोमा उनीसँगै संजिता कोइराला पनि फिचर्ड छिन् ।

एलबम ‘मोडहरुमा’ समावेश यस गीतमा विजय शिवाकोटीको शब्द छ । एकदशक अघि फिल्म ‘कलिउड’ निर्देशन गरेका निर्देशक नवराज आचार्यले भिडियोको निर्देशन गरेका छन् । अमेरिकामा छायांकन गरिएको भिडियोमा भरत रेग्मीको सम्पादन तथा कलर ग्रेडिङ र शम्भु मोक्तानको छायांकन छ । भिडियोमा एन्सेर्ज गुरुङ, जङ्ग्बु शेर्पा र नवीन ढकालको पनि अभिनय रहेको छ ।

अभिनेता कोइरालाले गायक विष्टको गीतमा अभिनय गर्न पाउनु एउटा राम्रो अवसर भएको बताए । राजले अमेरिकामा रहँदा तीनवटा म्युजिक भिडिओमा अभिनय गरेका छन् । पछिल्लो पटक उनले तीन वर्षअर्घि अम्बिका गुरुङ र रामकृष्ण ढकालको गीतमा अमेरिकामा नै अभिनय गरेका थिए । कोइरालाले ‘पर्खि बसें’, ‘गुरु दक्षिणा’, ‘पहिलो पहिलो माया’, ‘किन लाग्छ माया’, ‘पल’, ‘प्रितिको फुल’, ‘मसान’, ‘ऋतु’ लगायतका तीस बढी नेपाली फिल्मसँगै हलिउड फिल्म ‘हाइवे टु धम्पुस’मा पनि अभिनय गरेका छन् ।

गायक ओमका ‘म मौनतामा अल्झिरहेको एउटा जीवन’, ‘सुन चाँदीभन्दा’, ‘बदनाम भै नजाऊ’, ‘नभनिदेउ तिम्रो ओठको लाली’, ‘म सम्झन्थे हो’, ’मलाई मात्रै हो कि प्रिति बिझाएको’जस्ता गीत हिट छन् ।