काठमाडौँ– कांग्रेसका वरिष्ठ नेता रामचन्द्र पौडेलले सभापति तथा प्रधानमन्त्री शेरबहादुर देउवा इतर समूहबाट सभापतिको एक जनामात्र उम्मेदवार हुने बताएका छन् ।

बिहीबार पार्टी कार्यालय सानेपामा सभापतिका आकांक्षीहरुलाई दायाँबायाँ राखेर पौडेलले आफ्नो समूहले सभापतिमा एकजनामात्र उम्मेदवार बनाउने दावी गरे । उनले आफूहरुमा सभापतिको एकजनामात्र सभापतिको उम्मेदवार बनाउने सहमति भएकोसमेत बताए ।

पौडेल समूहमा रहेका महामन्त्री डा. शशांक कोइराला, पूर्वमहामन्त्री प्रकाशमान सिंह, केन्द्रीय सदस्य शेखर कोइराला र सुजाता कोइरालालाई दायाँबायाँ राखेर पौडेलले सभापतिलगायत सबै पदाधिकारीको टिम तयार पारिने बताए । उनले पार्टी बचाउन आफूहरु एक भएर लड्नेसमेत बताए ।

नेपाली समाजलाई लोकतान्त्रिककरण गर्न आवश्यक रहेको भन्दै जनताको भरोसाको पार्टी बनाउनुपर्ने आवश्यकता रहेको उनले बताए । पत्रकार सम्मेलनमा बरिष्ठ नेता पौडेलले क्रियाशील सदस्यहरुको विवाद कायमै हुँदा निष्ठावान कार्यकर्ताहरु पीडित भएकाले यसलाई बिधिसम्वत समाधान गर्नुपर्ने धारणा पनि राखे ।

पौडेल समूहका नेताहरु उम्मेदवार टुंग्याउन लगातार छलफलमा रहे पनि उम्मेदवारको नाममा सहमति भने गर्न सकेका छैनन् ।

शुक्रबारदेखि कांग्रेसको वडा अधिवेशन सुरु हुँदैछ । वडा अधिवेशन सुरु हुनु अघि नै पौडेल समूहले आफूहरुबीच सहमति हुने सन्देश दिन बिहीबार पत्रकार सम्मेलन गरेर आफ्नो धारणा सार्वजनिक गरेको हो ।

पौडेल समूहमा सभापतिका आकांक्षीहरु धेरै हुँदा सहमति नभइरहेका बेला देउवा समूहका नेताहरुले भने धमाधम सभापतिको उम्मेदवार बन्ने घोषणा गरिरहेका छन् ।

उपसभापति विमलेन्द्र निधिले सम्पर्क कार्यालय नै स्थापना गरेर सभापतिको उम्मेदवार बन्ने घोषणा गरेका छन् भने केन्द्रीय सदस्य गोपालमान श्रेष्ठले बिहीबार गृह जिल्ला स्याङ्जा पुगेर आफू पनि सभापतिको उम्मेदवार बन्ने घोषणा गरेका छन् ।

पौडेल समूहमा रहेका कल्याण गुरुङले पनि सभापतिको उम्मेदवार बन्ने घोषणा गरेर बिहीबार जिल्ला दौडाहामा निस्केका छन् ।

यसैबीच पार्टीको १३ औं महाधिवेशनमा कृष्णप्रसाद सिटौला समूहबाट महामन्त्रीको उम्मेदवार बनेको गगन थापा बिहीबार पौडेल समूहमा खुलेका छन् । यसअघि नै महामन्त्रीको उम्मेदवार बन्ने घोषणा गरेका थापा बिहीबार वरिष्ठ नेता पौडेलसँगै मञ्चमा देखिएका थिए । उनी यो समूहबाट महामन्त्रीको उम्मेदवार बन्ने तयारीमा रहेका छन् ।