काठमाडौँ– नारायणगढ–मुग्लिन सडकखण्डको दुई स्थानमा पहिरो खस्दा अवरुद्ध भएको सडक एकतर्फी रूपमा सञ्चालनमा आएको छ ।

चितवनको इच्छाकामना गाउँपालिका–६ पाँचकिलो र चार किलोमा पहिरो जाँदा आज बिहान २ बजेदेखि सडक अवरुद्ध भएको थियो ।

सडक अवरुद्ध भएसँगै काठमाडौँका लागि छुटेका तथा काठमाडौँदेखि बाहिरी जिल्लाका लागि छुटेका सयौँ सवारी साधन बीच बाटोमै अलपत्र परेका थिए । १० घण्टाभन्दा बढी समय लगाएर पहिरो पन्छाएसँगै साँझ ६ बजेबाट एकतर्फी रुपमा बाटो सञ्चालनमा आएको जिल्ला प्रहरी कार्यालय चितवनले जनाएको छ ।

पहिरो पन्छाउँदै गर्दा सडकमाथिबाट थप पहिरो खस्दा सडक खुलाउन लामो समय लागेको हो । सडक सुचारू भएसँगै बिहानदेखि रोकिएका सवारी साधनहरूलाई गन्तव्यतर्फ पठाउन थालिएको छ ।

बिहीबार पनि सोही सडकको विभिन्न स्थानमा पहिरो खस्दा सडक अवरुद्ध भएको थियो ।