मुम्बई(अमर उजाला)– अभिनेता दिलीप कुमारको निधन पछि उनको छायाका रुपमा रहेकी सायरा बानोको स्वास्थ्यमा समस्या देखिएको छ । दिलीपको निधन पछिको शोकले सायराको शरीर अस्वस्थ बनेको हो । उनी तीन दिनदेखि हिन्दुजा अस्पतालमा उपचाररत छिन् ।

चिकित्सकका अनुसार उनको रक्तचाप सामान्य छैन र अक्सिजन लेभल पनि कम भइरहेको छ । जसकारण उनलाई श्वास लिन समस्या भएको छ । उनी आइसियूमा उपचाररत छिन् । उनी अझै केहीदिनसम्म अस्पतालमा नै हुनेछिन् ।

परिवारका सदस्यका अनुसार दिलीपको निधन पछि सायराको स्वास्थ्यमा दैनिक समस्या आइरहेको छ । दिलीपको निधन पछि न उनी कसैसँग भेट्छिन् न त बोल्छिन् नै । ‘सायराको सारा विश्व नै दिलीब साहब हुनुहुन्थ्यो । अहिले उहाँ नै नरहेपछि सायराको स्वास्थ्यमा ठूलो असर परेको छ,’ परिवारका एक सदस्यले भनेका छन् ।

अभिनेता दिलीपको गत जुलाई ७ मा ९८ वर्षको उमेरमा निधन भएको थियो । उनको राजकीय सम्मानका साथ अन्तिम बिदाइ गरिएको थियो । सायरा आफ्नो अभिनय र सुन्दरताका कारण फिल्मकर्मीदेखि दर्शकको मनमा बस्न सफल अभिनेत्रीका रुपमा चिनिन्छिन् ।

सायराले १७ वर्षको उमेरमा बलिउडमा पाइला चालेकी थिइन् । उनले सन् १९६१ मा शम्मी कपूरका साथ फिल्म ‘जंगली’बाट अभिनय सुरु गरिन् । उनले आफूलाई रोमान्टिक हिरोइनको छवि बनाएकी थिइन् ।

सन् ६० देखि ७० को दशकमा सायरा बलिउडको सफल अभिनेत्री थिइन् । उनी फिल्मसँगै अभिनेता दिलीप कुमारसँगको सम्बन्धले पनि चर्चामा आइन् ।

दिलीप र सायराको प्रेम हुँदा दिलीप ४४ र सायरा २२ वर्षका थिए । उनीहरुले सन् १९६६ मा विवाह गरे ।