काठमाडौँ- प्रधानन्यायाधीश चोलेन्द्र शमशेर राणाले वरिष्ठताका आधारमा संवैधानिक इजलास गठन गर्ने प्रतिबद्धता जनाएका छन् ।

सर्वोच्च अदालत बारका प्रतिनिधिसँग आज भएको छलफलमा इजलास गठनमा देखिँदै आएको विवाद नदोहोरिने गरी दीर्घकालीन समाधान खोज्न राणा सहमत भएको सर्वोच्च बारका अध्यक्ष पूर्णमान शाक्यले जानकारी दिए ।

त्यसका लागि सर्वोच्च अदालतको कार्यसञ्चालन नियमावली संशोधन गर्न राणा तयार भएको उनले जानकारी दिए ।

‘प्रधानन्यायाधीशज्यूले एकसाताभित्रै कार्यसञ्चालन नियमावली परिमार्जन गरेर वरिष्ठताका आधारमा संवैधानिक इजलास गठन गर्ने भन्नु भएको छ,  सम्भवत आजको सुनुवाइ स्थगित होला,’ उनले भने ।

प्रतिनिधिसभा विघटनको मुद्दा र संविधानको धारा ७६ को ५ अनुसार सरकार गठनको मुद्दा हेरिरहेको सर्वोच्चको संवैधानिक इजलासमा रहेका न्यायाधीशहरू बमकुमार श्रेष्ठ र तेजबहादुर केसीको सम्बन्धमा मुद्दाको पक्षका कानून व्यवसायीले प्रश्न उठाउँदै आएका छन् ।