दोहा : वैदेशिक रोजगारीका क्रममा मलेसियामा लडेर शारीरिक रुपमा अशक्त बनेका एक नेपालीको उद्धार भएको छ ।

सामाजिक कल्याण संघ जनउद्धार केन्द्र मलेसियाले लामो समयदेखि शारीरिक अशक्त अवस्थामा रहेका धनकुटा राजारानीका नन्दकुमार लिम्बुको उद्धार गरी स्वदेश फर्काएको हो ।

आर्थिक अभावले अस्पतालबाट डिस्चार्ज समेत हुन नसकेका उनलाई जनउद्धार केन्द्रको पहलमा उपचार खर्च मिनाहा गरी स्वदेश फर्काइएको हो ।

लिम्बुसँगै उनको सहयोगीको रुपमा सोही स्थानका मोहन सुब्बालाई समेत हवाईभाडा उपलब्ध गराई हिमालयन एयरलाइन्सको चार्टर उडानमार्फत स्वदेश फर्काइएको केन्द्रका अध्यक्ष केशु थापा जानकारी दिए ।

उनलाई लिएर थापा तथा कोषाध्यक्ष देबेन्द्र गिरी मलेसियास्थित क्वालालम्पुर विमानस्थल पुगेका थिए ।

केशु थापा भन्छन् , ‘लिम्बुलाई कुनैपनी हालतमा घर फर्काउने संकल्प लिएका थियौं, त्यसैको दौरान कयौंपटक अस्पताल , अध्यागमन लगायत विभिन्न निकायहरुमा धाउदा पाएको / दिइएको सास्ती उनलाई विमानस्थल पुर्‍याएर फर्कदा सबै भुलेको छु ।’

यस कार्यमा कागजी र प्रशासनिक सहयोग गर्ने नेपाली दूतावास मलेसिया, अध्यागमन केन्द्र तथा विभिन्न ठाउँमा लाग्ने खर्च उपलब्ध गराउन भुमिका खेल्ने मोहन सुब्बा लगायत सम्पूर्ण सहयोगी मनहरुलाई जनउद्धार केन्द्र मलेसियाले धन्यवाद दिएको छ ।

आफू काम गर्ने कम्पनी अगाडि लडेर उनी शारीरिक रुपमा अशक्त बनेका थिए ।