आजकल धेरै मानिसमा उच्च रक्तचापको समस्या हुने गरेको छ । यो विश्वब्यापी रुपमा बढ्दै गएको स्वास्थ्य समस्या मध्ये एक हो । हरेक वर्ष विश्वभर उच्च रक्तचापका कारण ७५ लाखबढि मानिसको मृत्यु हुने गरेको छ ।

मुटु सम्बन्धी रोगका कारण हुने उच्च रक्तचापको समस्याले शरीरको रक्त सञ्चारमा प्रभाव पार्दछ । जसका कारण स्ट्रोक हुने सम्भावना उच्च हुन्छ । त्यसैले नियमित रुपमा रक्तचाप (ब्लड प्रेसर)को परीक्षण गराइरहनु पर्दछ । तर रक्तचाप नाप्दा हुने साधारण लापरबाहिले कतिपय मानिसको रक्तचाप बढि देखिने गर्दछ । यस्ता लापरबाहिलाई यसरी घटाउनु पर्दछ ।

– रक्तचाप जाँच गर्दा बोल्नु हुदैँन । धेरै बोलेमा वास्तविक भन्दा धेरै रक्तचाप देखिन्छ ।
– रक्तचाप परीक्षणका क्रममा शान्त बस्नु पर्दछ ।
– लुगा बाहिर रक्तचाप नाप्ने मेसिनको कफ (बिपी कफ)लाई बाध्नु हुदैन ।
– लुगा बाहिर कफ बाधेमा रक्तचापको सही नाप आउँदैन ।
– बिपी कफले रक्त चाप नापिने व्यक्तिको पाखुराको छाला छोएको हुनु पर्दछ ।
– बिपी कफ लगाइ सकेपछि हातलाई उठाउनु वा झुण्ड्याउनु हुँदैन ।
– बिपी कफलाई मुटुको समानान्तर हुने गरी मिलाएर राख्नु पर्दछ ।
– रक्तचाप नाप्दा निहुरीएर वा उत्तानो परेर बस्नु हुदैन । सीधा बस्नु पर्दछ ।
– रक्तचाप नाप्दा खुट्टा खप्ट्याएर बस्नु हुँदैन । दुवै खुट्टा अलगअलग हुनु पर्दछ ।
– सकेसम्म खुट्टाले जमिन वा बसेको स्टुलको टेक्ने ठाउँमा आड लागेको हुनु पर्दछ ।
– पिसाब लागेको बेला रक्तचाप नाप्नु हुँदैन । अन्यथा बढि देखिन सक्छ ।