काठमाडौं– राष्ट्रपति विद्यादेवी भण्डारीलगायत बाग्मती प्रदेशका प्रदेश प्रमुख तथा मुख्यमन्त्रीसहितको एक तस्वीर सामाजिक सञ्जालमा भाइरल बनेको छ ।

तस्वीरमा राष्ट्रपति भण्डारी सोफामा बसेकी छिन् भने बाग्मती प्रदेश प्रमुख बिष्णुप्रसाद प्रसाईं र मुख्यमन्त्री डोरमणि पौडेललगायत सोफाभन्दा पछाडि उभिएका छन् ।

राष्ट्रपति विद्यादेवी भण्डारी मंगलबार शहीद स्मारक एवं प्रजातान्त्रिक पार्कको उद्घाटनका लागि हेलिकोप्टर चढेर हेटौंडा पुगेकी थिइन ।

राष्ट्रपति सवार हेलिकोप्टर प्रदेश प्रहरी कार्यालय परिसरमा रहेको हेलिप्याडमा अवतरण भएको थियो ।

कार्यक्रम सकेर फर्कने बेलामा राष्ट्रपतिको बिदाई गर्न बागमतीका प्रदेश प्रमुख प्रसाईं र मुख्यमन्त्री पौडेल लगायतको टोली हेलिप्याडमै पुगेका थिए ।

त्यसक्रममा सामूहिक तस्वीर खिचाउने कुरा भएपछि राष्ट्रपतिका लागि एकाएक त्यहाँ सोफाको व्यवस्था गरिएको थियो ।