काठमाडौं – सहिद स्मारक ए डिभिजन लिगमा साविक विजेता मनाङ मर्स्याङ्दी क्लबले आफ्नो अपराजित यात्रा कायमै राखेको छ ।

नवौं चरणमा संकटा क्लबसँगको खेलमा ३–० गोलको जीत निकाल्दै मनाङले अपराजित यात्रालाई यथावत राखेको हो ।

संकटाका अमित तामाङको आत्मघाती गोलमा मनाङले अग्रता लिएको थियो । उनले खेलको ४२ औं मिनेटमा गोल गरेका थिए । त्यस्तै, त्यसको एक मिनेटपछि अन्जन बिष्टले गोल गर्दै टिमलाई पहिलो हाफमा २–० गोलको सहज अवस्थामा पुर्याएका थिए ।

पहिलो हाफमा २–० गोलमा सकिएको खेलको ७१ औं मिनेटमा निशान लिम्बुले गोल गर्दै टिमलाई ३–० गोलको जीत दिलाएका थिए ।

जीतसँगै मनाङ १९ अंकसहित लिगको तस्रो स्थानमा यथावत रहेको छ ।

मनाङले अहिलेसम्म खेलेमा ९ खेलमा ५ मा जीत र ४ खेल बराबरी खेल्दै अपराजित रहन सफल भएको छ । यता पराजित संकटा भने लिगको १२ अंकसहित ८ औं स्थानमा छ ।

अघिल्लो बर्ष दोस्रो भएको संकटा यो सिजनमा भने शीर्ष ६ का लागि संघर्ष गरिरहेको छ ।